“Плыві, плыві, ладдзя алімпіяды…”
Завяршыўся трэці этап рэспубліканскай алімпіяды па замежных мовах. Лепшыя ў Мінскай вобласці знаўцы англійскай, нямецкай, французскай, іспанскай моў змаглі прымяніць веды ў лексіка-граматычным тэсце, вусным выказванні (сітуацыі), аўдзіраванні.
Удзельнікі засталіся задаволеныя арганізацыяй мерапрыемства, добразычлівай атмасферай, настраёвасцю эмацыянальных канцэртных праграм. На цырымоніі закрыцця вучні прымацавалі да геаграфічнай карты (свайго раёна) выяву птушкі як непаўторны сімвал алімпіяды.
Упаўнаважаны прадстаўнік упраўлення адукацыі Мінаблвыканкама начальнік аддзела замежных моў Мінскага абласнога інстытута развіцця адукацыі Наталля Казіміраўна Радзевіч шчыра падзякавала ўдзельнікам алімпіяды, іх настаўнікам, кіраўнікам каманд, журы, адзначыла высокі ўзровень правядзення алімпіяды, камфортныя ўмовы, створаныя аддзелам адукацыі, спорту і турызму Дзяржынскага райвыканкама, адміністрацыяй і педагагічным калектывам абласнога аграрна-тэхнічнага ліцэя. Надоўга запомніцца мудры наказ Наталлі Казіміраўны: “Праз любоў да роднай краіны, сваёй зямлі можна змяніць свет да лепшага, і дасканалае веданне замежных моў вам у гэтым дапаможа”. Шчыра падзякавала вучням, пажадалі поспехаў упаўнаважаныя прадстаўнікі ўпраўлення адукацыі Мінаблвыканкама метадысты Шыльцава Ілона Уладзіміраўна, Кісляк Данута Андрэеўна.
Але самае галоўнае і самае прыемнае для Дзяржынскага раёна – высокія вынікі, якія прадэманстравалі нашы навучэнцы. Вучаніца дзявятага класа гімназіі №1 г.Дзяржынска Клокава Марыя (настаўнік – Вайцяхоўская Аксана Антонаўна) атрымала дыплом першай ступені па англійскай мове. Дыпломамі другой ступені па англійскай мове ўзнагароджаны вучні гэтай жа ўстановы адукацыі: вучань адзінаццатага класа Радчанка Ілья (настаўнік – Іванова Вольга Аляксандраўна), вучаніца дзявятага класа Карніцкая Карына (настаўнік – Вайцяхоўская Аксана Антонаўна). З годнасцю прадставілі наш раён, выступілі найлепшым чынам вучаніца адзінаццатага класа гімназіі №1 г.Дзяржынска Чыгір Ганна (настаўнік – Валахановіч Таццяна Мікалаеўна) па нямецкай мове, вучаніца дзясятага класа сярэдняй школы №4 г.Дзяржынска Чарнавус Паліна (настаўнік – Шука Таццяна Уладзіміраўна) па французскай мове, вучаніца дзясятага класа гімназіі г.Дзяржынска Гармаза Паліна (настаўнік – Аляксеева Таццяна Віктараўна), вучаніца дзясятага класа гімназіі №1 г.Дзяржынска Скуратовіч Вераніка (настаўнік – Іванова Вольга Аляксандраўна) па англійскай мове.
Віншуем алімпійцаў і іх настаўнікаў! Жадаем поспехаў на заключным этапе галоўных інтэлектуальных спаборніцтваў. Няхай заўсёды шчасліва плыве ўпэўненая ладдзя алімпіяды!
