Дзень настаўніка замежнай мовы
Настаўнікі англійскай мовы раёна падчас VІ абласнога педагагічнага марафону сталі актыўнымі ўдзельнікамі семінара “Выкарыстанне мультымедыйных прэзентацый і відэаматэрыялаў як сродак павышэння матывацыі вучняў да вывучэння замежнай мовы”. У якасці мадэратара метадычнага мерапрыемства выступіла кіраўнік раённага рэсурснага цэнтра па англійскай мове намеснік дырэктара па вучэбна-метадычнай рабоце, настаўнік гімназіі г.Фаніпаля Раманава Ганна Валер’еўна.
Маладыя спецыялісты, а таксама настаўнікі са стажам работы да пяці гадоў пазнаёміліся глыбей з найноўшымі формамі і метадамі работы, з дапамогай якіх вучэбны ці факультатыўны занятак, пазакласнае мерапрыемства можна зрабіць не толькі пазнавальным, але і цікавым, захапляльным для вучняў. Як мультымедыйная прэзентацыя ці відэафрагмент спрыяе стварэнню сітуацыі поспеху, нязмушанай камунікацыі вучняў? Якім чынам сфарміраваць у навучэнцаў лінгвакультуралагічную кампетэнцыю? Як наогул садзейнічаць рэалізацыі кампетэнтнаснага падыходу? На гэтыя хвалюючыя пытанні атрыманы грунтоўныя адказы.
“Неабходна бесперапынна рухацца наперад у спасціжэнні інавацыйных ідэй і тэхналогій, каб быць цікавымі для вучняў”, – такі вывад быў зроблены падчас наладжанага інтэрактыўнага дыялогу, насычанага прафесійнага роздуму.